Wanachama wa Chama cha Wanasheria wa Kenya (LSK), tawi la Thika, mnamo Ijumaa alasiri waliwasha mishumaa katika eneo la maegesho ya magari la Mahakama ya Thika kumkumbuka mwenzao, Wakili Kyalo Mbobu, aliyeuawa kwa kupigwa risasi jijini Nairobi mapema wiki hii.
Wakiongozwa na mwenyekiti wa tawi hilo, Wanjiru Mwangi, wanasheria hao walitoa wito kwa Idara ya Upelelezi wa Jinai (DCI) kuharakisha uchunguzi na kuhakikisha waliohusika na mauaji hayo ya kikatili wanakamatwa na kufikishwa mbele ya sheria.
Mwangi alisisitiza kuwa jamii ya wanasheria haitatishwa na vitendo vya kikatili, akiahidi kuwa vitisho kama hivyo vitawatia nguvu zaidi kuendelea kutetea haki.
Alieleza kuwa mashambulizi dhidi ya wanasheria yanadhoofisha utawala wa sheria na hayapaswi kuvumiliwa katika nchi inayoheshimu katiba.
Collins Wanderi, mmoja wa wanafunzi wake wa zamani, alikumbuka jinsi alivyokuwa mwalimu makini aliyewataka wanafunzi wake kujitahidi kufikia viwango vya juu huku akiwaongoza kwa moyo wa dhati na msaada usioyumba.
“Alikuwa daima tayari kwa ajili ya wanafunzi wake, akiwalea wengi wetu hadi kuwa wanasheria waliobobea,” alisema Wanderi, akiongeza kuwa urithi wa Mbobu katika taaluma ya sheria utaendelea kuishi kupitia wale aliowalea.
