Waziri mkuu wa Uingereza Keir Starmer ametangaza uamuzi wa nchi hiyo wa kutambua rasmi taifa la Palestina.
Tangazo hili linajiri miaka zaidi ya 100 tangu tamko la Balfour kuunga mkono kuanzishwa kwa taifa la Palestina makao ya wayahudi na miaka 77 tangu kuanzishwa kwa Israel chini ya mamlaka ya Uingereza huko Palestina.
“Kufuatia kuongezeka kwa hali ya kutisha katika Mashariki ya Kati, tunachukua hatua kuendeleza uwezekano wa amani na suluhisho la mataifa mawili,” Starmer alisema katika taarifa ya video Jumapili.
Serikali ya Uingereza ilisema mwezi Julai kuwa ingebadili msimamo wake wa muda mrefu wa kuchelewesha utambuzi wa Palestina hadi wakati unaodhaniwa kuwa wa athari kubwa zaidi.
Hatua hii isingechukuliwa iwapo Israel ingesitisha vita vyake vya mauaji ya halaiki Gaza, ijitolee kwa mchakato wa amani wa muda mrefu na endelevu unaoleta suluhisho la mataifa mawili na iruhusu misaada zaidi kuingia kwenye eneo hilo.
Lakini hali ya maafa huko Gaza imezidi kuwa mbaya zaidi katika wiki chache zilizopita, jeshi la Israel linapoendelea kuharibu Jiji la Gaza makusudi ili kuliteka, huku likiendelea kuwanyima chakula na kuwafukuza watu walioathirika na njaa katika eneo hilo.
Mashambulizi ya kila siku yanayoendeshwa na wanajeshi wa Israel na mashambulizi kutoka kwa walowezi bado yanaendelea katika Ukingo wa Magharibi unaokaliwa kwa mabavu.
Israel pia inaendeleza mipango ya kuliteka kabisa eneo hilo la Wapalestina na “kuzika” wazo la kuwepo kwa taifa la Palestina lililounganishwa lenye mji mkuu huko Jerusalem Mashariki inayokaliwa.
Hatua hii ya kihistoria inajiri wakati Canada, Australia, na Ureno pia zimelitambua rasmi taifa la Palestina siku mbili kabla ya kuanza kwa kikao cha 80 cha Baraza Kuu la Umoja wa Mataifa (UNGA).
Suala la mamlaka ya Palestina baada ya miongo ya ukaliaji na ubaguzi wa Israel litakuwa ajenda kuu ya mkutano huo.
Starmer ameahidi kuchukua hatua zaidi kuwawekea vikwazo viongozi wa juu wa Hamas katika wiki zijazo na kusisitiza kuwa kundi hilo halitakuwa na nafasi yoyote katika mustakabali wa Palestina.
Alisisitiza pia kuwa hatua ya kulitambua taifa la Palestina haitalitia nguvu kundi la Hamas, ambalo alilielezea kama “kundi la kigaidi katili linalotaka kuangamiza Israel.”
“Wito wa suluhisho la kweli la mataifa mawili ni kinyume kabisa na maono yao ya chuki,” alisema Starmer.
