Afisa wa Idara ya Upelelezi wa Jinai – DCI aliwapiga risasi na kuwaua waendesha bodaboda wawili karibu na Kituo cha Polisi cha Makongeni jana Jumapili asubuhi kufuatia mzozo uliotokea baada ya ajali ndogo kati ya gari lake na pikipiki.
Kulingana na Mwenyekiti wa Chama cha Waendesha Bodaboda wa Kamenu Stages, Wilson Kibe, mmoja wa wanachama wake aligongwa kutoka nyuma na gari la kibinafsi lililokuwa na abiria mmoja, jambo lililomlazimu kusimama ili kukagua madhara.
Kibe alisema walipokuwa wakijadiliana kuhusu jinsi ya kumaliza suala hilo, waendesha bodaboda wengine walikusanyika eneo hilo. Inadaiwa kuwa dereva huyo aliyekuwa na silaha aliwadhihaki na kuwaambia wachome gari lake.
Wakati wa mzozo huo, afisa huyo alifyatua risasi na kuwaua waendesha bodaboda wawili wenye umri wa miaka 38 na 39 kutoka eneo la Makongeni.
Vifo vyao vilizua hasira, na wakazi waliokuwa na ghadhabu walichoma na kuharibu gari hilo aina ya Audi la afisa huyo licha ya juhudi za waendesha bodaboda kuwatuliza.
“Ni uchungu mkubwa kupoteza wanachama wetu wawili kwa njia ya kikatili kama hii. Tunataka haki itendeke kwa sababu maisha yao yalikatizwa bila sababu,” alisema Kibe.
Kamanda wa Polisi wa Kaunti Ndogo ya Thika Magharibi, Lawrence Muchangi, alithibitisha tukio hilo na kusema kuwa afisa huyo alikuwa akiendesha kuelekea eneo la Landless wakati ajali ilipotokea.
“Maafisa walipofika eneo la tukio, dereva wa gari la Audi alionekana kuwa mlevi, mwenye fujo, akiwa na silaha. Alikataa kusalimisha silaha na kwa bahati mbaya aliwapiga risasi mashuhuda wawili wasio na hatia waliofariki” Muchangi alisema.
Mtuhumiwa aliyetambuliwa kuwa afisa wa DCI aliyewahi kuhudumu Thika kabla ya kuhamishiwa Nairobi, alikamatwa na kupokonywa silaha na maafisa wa trafiki kabla ya kupelekwa katika Kituo cha Polisi cha Thika.
Silaha yake ilichukuliwa kama ushahidi.
Miili ya wawili hao ilihamishiwa hifadhi ya maiti ya General Kago, huku mabaki ya gari la Audi lililochomwa yakipelekwa hadi Kituo cha Polisi cha Makongeni.
