Kiongozi wa chama cha Democratic Party (DP), Justin Muturi, amekataa vikali uwezekano wowote wa kushiriki mazungumzo na Rais William Ruto au kiongozi mwingine yeyote wa kisiasa anayetafuta kuunda muungano.
Akizungumza huko Imenti Kaskazini, Muturi, ambaye ni mwanasheria mkuu wa zamani, alisisitiza msimamo wa chama chake wa kudumisha uhuru na uadilifu katika mazingira ya sasa ya kisiasa.
Amekariri dhamira yake ya dhati ya kupigania haki, ukweli, na haki za Wakenya wa kawaida.
Muturi ambaye ni Waziri wa zamani wa Utumishi wa Umma katika serikali ya Kenya Kwanza alieleza kuwa chama cha DP hakitasaliti misingi yake kwa ajili ya manufaa ya kisiasa ya muda mfupi au miungano ya muda, akibainisha kuwa matukio ya hivi majuzi katika uongozi wa nchi yameonesha madhara ya miungano ya kisiasa ya kimaslahi.
