Pendekezo la kuanzisha tawi la Chuo cha Kenya Institute of Highways and Building Technology (KIHBT) katika Kaunti ya Marsabit limeibua matumaini makubwa miongoni mwa wakazi, viongozi na wadau wa maendeleo.
Wengi wanaamini kuwa hatua hiyo inaweza kuleta mabadiliko makubwa kwa miundombinu ya eneo hilo pamoja na kuwawezesha vijana kitaaluma.
Akizungumza wakati wa uzinduzi wa eneo litakapojengwa chuo hicho katika sehemu ya Turbi, eneo bunge la North Horr, Mkurugenzi wa KIHBT Geoffrey Githiri alisema kuwa Kenya inalenga ukuaji jumuishi kupitia mafunzo ya ujuzi ya kimaeneo na uendelezaji wa miundombinu.
Alibainisha kuwa tawi hilo litakuwa la tano nchini na litaweka msingi wa maendeleo ambao eneo la Marsabit limekuwa likiusubiri kwa muda mrefu.
Githiri aliongeza kuwa uanzishwaji wa chuo hicho utafungua fursa kubwa za kiuchumi katika eneo hilo, huku wanafunzi wakitarajiwa kutoka maeneo mbalimbali ya Kenya.
Alisema kuwa hatua hiyo pia itawawezesha vijana kutoka maeneo ya kaskazini mwa Kenya – yakiwemo Samburu, Isiolo, Wajir, na Mandera – kupata ujuzi muhimu wa teknolojia ya ujenzi, hivyo kuwaweka katika nafasi nzuri ya kupata ajira katika miradi mikubwa ya miundombinu inayotekelezwa katika eneo hilo pana.
Katika miaka ya hivi karibuni, wakaazi wa maeneo haya walilazimika kufanya kazi duni zisizohitaji ujuzi wa kitaalamu kwenye miradi kama vile ujenzi wa barabara ya Isiolo–Marsabit–Moyale, ujenzi unaoendelea wa barabara ya Horn of Africa Gateway Development kutoka Isiolo hadi Mandera kupitia Modogashe, pamoja na mradi wa LAPSSET unaojumuisha bandari ya Lamu na barabara za kuelekea Sudan Kusini na Ethiopia.
Mbunge wa North Horr, Wario Guyo, alisema kuwa kwa miongo kadhaa, Marsabit – kaunti kubwa na inayopakana na Ethiopia – imekuwa nyuma katika kuwa na wataalamu wa ujenzi na miundombinu.
Alisisitiza kuwa chuo hicho kikiwa karibu, vijana wa Marsabit watapata mafunzo bora ya uhandisi wa ujenzi, ujenzi wa barabara, teknolojia ya majengo, na huduma za maji bila kulazimika kusafiri mbali.
Halkano Umuro, ambaye ni mhitimu wa tawi la Ngong la KIHBT, aliipongeza taasisi hiyo kwa kutoa mafunzo ya vitendo na ujuzi kwa wanafunzi wake.
Kulingana naye, kuanzishwa kwa chuo cha KIHBT Marsabit kutapunguza gharama kubwa ya elimu ya kiufundi na wakati huo huo kusaidia katika kujenga nguvu kazi yenye ujuzi inayokidhi mahitaji ya maendeleo ya ndani na kutoa ajira kwa vijana wa eneo hilo.
Mwenyekiti wa Kamati ya Amani na Maendeleo ya Turbi, Katelo Duba, alisema kuwa changamoto nyingi za maendeleo zinazokumba kaunti hiyo – kama vile barabara duni, uhaba wa nyumba bora, na miundombinu haba ya maji – zinatokana kwa kiasi kikubwa na ukosefu wa mafundi wa kitaalamu katika eneo hilo.
